ياك قالو ليكم “المروك” كاري الطوبيسات من عند الصبليون؟ ياك “إعلام الصرف الصحي” ديال القوة الضاربة (ضاربة راسها فالحيط) ناض يهلل ويطبل وقاليك المغرب ما عندوش أسطول نقل وحنا الهربة؟ إيوا شدو ريوسكم مزيان وقراو هاد “النكتة الرسمية” اللي خرجات من عند وكالة “نازا” الجزائرية، عفواً، مديرية النقل لولاية الجزائر.
فالوقت اللي المغرب كيدشن محطات طرقية بمواصفات عالمية، وكيربط المدن بالتي جي في (TGV)، وكنافسو على تنظيم كأس العالم بأسطول نقل “عمرهم حلمو بيه” العدو قبل الصديق، ناضت مديرية النقل فالعاصمة ديال “القوة الضاربة” خرجات بلاغ تاريخي.. بلاغ “تسونامي”.. كتقلب فيه على “مستثمرين” باش يخدمو خط “الرغاية”.
واش عارفين شنو هو الشرط “التعجيزي” باش تكون مستثمر في هاد القوة الكونية؟ خاص تكون عندك “طوموبيلة” كتهز 12 بلاصة! نعم أسيدي، الدولة اللي عندها الغاز والبترول، ومصدعة لينا راسنا بأنها أقوى منظومة صحية ونقلية فالمجرة، وحلة فـ “خطاف” عندو “هوندة” ولا “J5” باش يوصل عباد الله من حي 2000 مسكن للمحطة!
والطامة الكبرى ماشي هنا، الطامة هي “الرقمنة” اللي صدع لينا بها تبون راسنا.. قاليك باش تدفع الطلب خاصك تصيفتو “بالبريد المضمون” لصندوق البريد فالأبيار وا عباد الله واش حنا فـ 2026 ولا فـ 1904؟ العالم كيخدم بالـ Apps وبالذكاء الاصطناعي، و”عمي تبون” باقي باغي “الرسالة والجواب والتنبر ديال 2 دراهم”.
من الطوابير على الحليب.. إلى “لهطة” البنان
هادشي ديال النقل غير نقطة فبحر الفضائح. راه ملي كتشوف دولة “النيف” (اللي عامر خنونة) وحلة فطرف حليب وشكارة سميدة، كتعرف بلي “القوة” راه ضاربة فالخوا. المغرب اللي كتقولو عليه “جيعان”، الخير فيه موجود، الخضرة والفواكه مشتتة فالأسواق حتى “داخ” ليكم داك المواطن ديالكم.
راه شفناه كاملين فالبث المباشر، داك “الزوالي” مسكين اللي دخل لسوق مغربي وتصدم فالخيرات.. وبدا “يغافل” فمول الديسير ويسرق فالبنان والتفاح وياكل بلهطة بحال شي واحد خارج من المجاعة. واش هادي هي العزة والكرامة؟ واش هادي هي بلاد “الشهداء”؟ حشمتو بينا وحشمتو بالتاريخ. المغاربة حلو ليكم البيبان، وكلوكم وشربوكم، ولكن “الغدار” عمرو يثمر فيه الخير. توحل ليكم فالفراج ان شاء الله دوك التفاحات اللي سرقتو من عرق الفلاح المغربي.
و المشكل ماشي فالشعب الجزائري المقهور، المشكل فدوك “العجزة” اللي حاكمين قصر المرادية. تبون وشنقريحة اللي كيفيقو بـ “المروك” وكينعسو بـ “المروك”. شادين الصفوف على العدس واللوبيا، واللي دوا يرعف، واللي قال “عاش الشعب” يمشي للحبس ولا يغبروه، ونايضين يعطيو الدروس للمغرب.
المغرب، يا سادة، فاتكم بسنوات ضوئية. حنا عندنا ملك شاب ورؤية استراتيجية، ومؤسسات خدامة (واخا النقد، ولكن الغاديين فالطريق الصحيح)، وأنتم عندكم عصابة شادة لبلاد وتفرق فالثروات على الانفصاليين والمرتزقة وشعبكم كيموت بالفقر والبرد فـ “الرغاية”.
رسالة أخيرة للكابرانات سيرو خدمو بلادكم، وسيرو شريو طوبيسات حقيقية لشعبكم بدل ما تقلبو على “مول الهوندة” بالبريد، وباراكا من الحقد على المغرب. راه القافلة تسير (بسرعة TGV)، والكلاب (ديال 12 بلاصة) تنبح.
المملكة المغربية الشريفة كبيرة عليكم، وتاريخها عظيم، وشعبها كريم ولكن “صعيييب” وعارف خباياكم. ديرو الصف، وسكتو، وتفرجو فالأسياد كيفاش كيبنيو الأوطان.
