أخزو زهير
إوا أسيدي، نكتة 2025 اللي كتضحك وكتبكي فـ نفس الوقت! كيهضروا على شي حاجة سميتها “الذكرى الخمسون للوحدة الوطنية”، ولكن أي وحدة وطنية؟ ديال من؟ هادوك الناس اللي شادينهم فـ مخيمات تندوف، عايشين فـ ظروف قاسية، لا ماكلة لا شرب، غير داكشي اللي كيتسرب ليهم بالزربة وبعض المساعدات اللي بزاف منها كيتسرق قبل ما توصل.
“الكيان الوهمي” ديال “البوليزاريو” مالقاو مايديروا باش يغطيوا على الفشل الذريع ديالهم، ناضوا جابوا “الصحافة” (إلا كانت شي صحافة أصلاً) وداروا لينا واحد “الفيلم” جديد، كيحاولوا يلصقوا ليه سمية “الذكرى الخمسون للوحدة الوطنية”. وحدة ديال شي وطن ما كاين غير فـ خيالهم!
“العسكر” والتمثيل وسط الخيمة!
تصور معايا المشهد: جابوا واحد شوية ديال الناس، كاين اللي عاطي فيه ملاك الموت العربون ميت وهو حي، ولبسوهم، وقالوا ليك: هذا هو “العسكر” ديالنا! ووقف داك “الرئيس الوهمي” وبعض “البرلمانيين” (الله ينجينا) كيترافعو فـ “قبة البرلمان” اللي هي غير خيمة مهترئة، وعلى الجناب غير الصحراء والتراب! فيلم هندي مدبلج ولكن بـ طابع مأساوي.
وهاد “العسكر” اللي كيهضروا عليه؟ راه كلشي عارف الخدمة ديالهم الحقيقية: هما فـ الأصل غير قطاع طرق وجماعات إرهابية معروفة على الصعيد الدولي. الأمم المتحدة فـ تقاريرها أكدات بلي الدور ديالهم هو التجارة فـ المخدرات والتجارة فـ البشر وخدمات إجرامية أخرى. يعني هما عصابة دايرة “التمثيل” باش توري شي صورة للناس اللي باقي ما فاقوش.
غير بغيت نقولها بـ صوت عالي: المغرب كبير بزااف على هاد “الأفلام الخاوية” و “المسرحيات الرخيصة”. الشعب المغربي كامل، ما كيعترفوش بـ هاد “الكيان الوهمي”. الصحراء مغربية و غتبقى مغربية إلى أن يرث الله الأرض ومن عليها. “البوليزاريو” ما عندهم غير الهضرة الخاوية والتصاور ديال الخيام والتمثيل.
نهاية الفيلم فـ “بوزبال”!
“الذكرى الخمسون للوحدة الوطنية” هي مجرد كذبة كبيرة غادية تزيد تفضحهم قدام العالم. الناس فـ المخيمات خاصها تعرف بلي المستقبل ديالها ماشي فـ الخيمة وتحت العسكر، ولكن فـ بلادها المغرب، تحت السيادة ديالها.
المرأة المغربية قالتها بكري: “المغاربة صحراويين، والصحراويين مغاربة. نقطة إلى السطر!”
المغرب فصحراءه، و “البوليزاريو” فـ الوهم ديالها. ما بقا غير العيب اللي غايكمل هاد “الفيلم” بـ “نهاية سعيدة” للمغرب، ونهاية “بوزبال” لـ “الكيان الوهمي”!
