تحول العرس الكروي فربع نهائي “الكان” بين نيجيريا والجزائر لـ “شوهة خايبة”، بعدما سالا الماتش بانتصار مستحق للنسور النيجيرية بجوج لزيرو. الجمهور الجزائري، وبدلا ما يتقبل الهزيمة بروح رياضية كيفما كيديرو الكبار، نوض “الروينة” فالتيران وخلق الفوضى.
مباشرة من بعد ما صفر الحكم، المدرجات شعلات، والتوتر وصل للطوب. شي وحدين من الجمهور الجزائري نساو بلي هادي غير كورة، وبداو فالتدافع مع “السيكيريتي” والمنظمين، وزادوها بالرشق وتهراس الحواجز، فمشهد كيسيء بزاف لصورة الكرة الإفريقية وكيبين بلي العقلية مازال بعيدة على الاحتراف.
الغريب فالموضوع، هو أن هاد النسخة من الكأس شهدات خروج منتخبات كبيرة وعريقة، ولكن جماهيرها خرجات “بعزها” وبروح رياضية عالية، وحتارمو الخصم والمنظمين، إلا الجماهير الجزائرية اللي خرجات عن النص وعطات صورة سوداوية مورا الإقصاء المرير.
المنتخب الجزائري ودع البطولة من الباب الصغير بهزيمة قاسية (2-0) قدام نيجيريا، ولكن “الخسارة الحقيقية” كانت فالمدرجات بهاد التصرفات اللي جبدات عليهم موجة غضب وانتقادات واسعة.
