أخزو زهير
اليوم، جريدة “فايس بريس” كتهرس “الخط التحريري المحايد” ديالها لسبب واحد: الضمير. حنا ماشي ضد الاحتجاج، بالعكس، الصحة، التعليم، والشغل، هادو حقوق أساسية للمواطن المغربي، و المطالبة بهم واجبة و حضارية. ولكن فين كايبدا هاد “الواجب” وفين كايسالي “اللعب بالنار”؟ هاد السؤال موجه لهدوك الناس، لي عارفين راسهم، لي حرضو شباب وقاصرين على الخروج للشارع.
في الأول، كانت المطالب واضحة و مشروعة: التعليم، الصحة، الشغل. ولكن فجأة، تحولت البوصلة لشي حوايج كبار، “إسقاط الحكومة”، ومن بعد… وصلات لشي حوايج ماكناش كنتوقعوها. واش هادشي كلو كان عفوي؟ ولا لعبة لتصفية الحسابات مع الدولة؟
لهدوك لي حرضو وراهم خارجين أرض الوطن كيبحال الخائن الوطن جيراندو و حجيب رضى ليلي و زيد و زيد:
واش دابا ناعسين مرتاحين؟ واش الضمير ديالكم مرتاح؟ ملي كتشوفو شباب وشابات، “جيل زيد”، مازالين تيعانيو، و حياتهم ضاعت ما بين أسوار السجون؟ واش هاد الشباب اللي خرجو، عارفين بالضبط شنو كيديرو ولا شنو بغاو؟ سمعو “مسيرة جيل زيد” و خرجو، كايحساب ليهم مسألة بسيطة، وهما فالحقيقة غير وقود فمعركة ماشي ديالهم.
قصة من تازة كتقطع القلب:
تواصلات معانا واحد السيدة من تازة، صوتها مخنوق، كاتبكي بالدم على خوها اللي تعتقل. السبب؟ “لعبة خونة الوطن”. هادي هي الحقيقة المرة. شكون اللي غيجاوب هاد الأم أو الأخت اللي ولدها أو خوها ضاعت ليه سنين من عمرو على قبل “حسابات سياسية” خبيثة؟
المطالب مشروعة.. ولكن الأهداف كانت خبيثة:
ملي كنشوفو شي أسماء بحال الزفزافي والخ… كتجينا الريح ديال شي حركات قديمة، لي بدات بمطالب اجتماعية بسيطة فمدينة “بنضال” (في إشارة لحراك الريف) وبغات تحارب “الفساد” و “الغلاء”، ولكن فالأخير، تحول الهدف الحقيقي ديال هدوك اللي ورا الستار، لـ الوصول لصاحب الجلالة الملك محمد السادس وللقصر. هاد الحلم، عمركم ما غاتحقوه. علاش؟
الملك والشعب خط أحمر:
حيت الشعب المغربي، كبير بزاف. حيت أجمل حاجة عندنا والحمد لله هي ارتباط الشعب المغربي مع الملك. حنا تنحبو الوطن ديالنا وتنحبو ملكنا، وهاد الرابط ماشي ورقة كيطويها أي واحد. المغرب غادي فالتنمية والبنية التحتية، من المونديال لكأس إفريقيا وزيد و زيد، هادشي كامل كايقلق هدوك لي مازالين عايشين بأفكار قديمة وبغاو الفتنة.
رسالتنا للشباب:
مستقبلكوم أهم من أنكم تحرقوه فصراعات ما عندكومش فيها لا ناقة ولا جمل. طالبو بحقوقكم، ولكن بطريقة الحضارية لي كايعرفها المغربي.
الوطن محتاج ليكم، ولكن ماشي ورا القضبان و القانون فوق الجميع.
يا لي كنتو سباب… واش فعلا ناعسين مرتاحين؟ التاريخ ما غايرحمكمش.
