أكدوا نجوم المنتخب الوطني المغربي، اليوم الخميس في مدينة سلا، بلي هوما واجدين وعازمين باش يحققو الفوز على منتخب الكاميرون، في الماتش القوي اللي غادي يجمعهم برسم ربع نهائي كأس إفريقيا للأمم، وبلي الهدف الأول والأخير هو يكملو المسار ديالهم فهاد “الكان” ويوصلو للمربع الذهبي.
وفي تصريحات صحافية قبل الحصة التدريبية لخرة اللي داروها في مركب محمد السادس لكرة القدم بالمعمورة، أجمعوا “الأسود” على أن الموعد ديال غدا الجمعة في ملعب الأمير مولاي عبد الله بالرباط (مع 8 د العشية)، غادي يكون حاسم ومصيري باش يضمنو التأهل ويفرحو الملايين د المغاربة اللي كيتسناوه.
فهاد السياق، قال إسماعيل الصيباري: “التحضيرات دازت في أجواء ممتازة وحنا مركزين باش نربحو اللقاء وندوزو لنصف النهاية”. وزاد وضح بلي فهاد الدور المتقدم، كاع المنتخبات كيكون عندها مستوى عالي، داكشي علاش “المانطال” (الجانب الذهني) هو اللي كيصنع الفرق وكيخليك تمشي بعيد في التظاهرة.
وأكد الصيباري بلي الرباح فهاد الماتش مهم بزاف باش يكتبو التاريخ، ووعد الجمهور المغربي بلي غادي يتقاتلو في التيران. وقال على الجمهور: “هوما جزء أساسي من هويتنا، والدعم ديالهم غدا غادي يكون حاسم.. الكاميرون فرقة قوية وخاصنا نلعبو معاهم بـ”النية” والندية”.
و من جهتو، قال المهدي لحرار بلي المنتخب كيوجد لهاد الربع نهائي بجدية كبيرة ورغبة قوية في الانتصار. وأضاف: “ماشي غير الكاميرون اللي قوية، كاع الماتشات فهاد “الكان” صعاب.. حنا غاديين دقة دقة، وواجدين باش نحققو نتيجة إيجابية”.
أما نايل العيناوي، فكانت هضرتو واضحة ومباشرة: “كنوجدو لماتش الكاميرون بحال إلا غادي نلعبو النهاية، وغادي نطبقو داكشي اللي طلب منا المدرب بالحرف باش نربحو”.
ونوه العيناوي بالخدمة اللي دار الناخب الوطني، وقال بلي نجح باش يبني “عائلة حقيقية” ومجموعة متماسكة ماشي غير فريق د الكورة، وتمنى هاد الانسجام يبان غدا في التيران ويجيب التيسير.
