بقلم: أخزو زهير
ملي كيتلف ليهم الضرب وكتحمى عليهم القفة داخلياً، كيلقاو الحل السحري لي ديما واجد في الرفوف: “المروك”. هاد القاعدة ولات مكشوفة عند النظام في الجارة الشرقية؛ كلما زادت الأزمات، كلما طلعو لينا بفيلم جديد من إخراج وبطولة “عمي تبون” ورعاية كابرانات الجزائر. وهاد المرة، الأمن الوطني الجزائري تفوق على راسو وجاب لينا سيناريو غادي يخلي مخرجي هوليوود يقطعو حوايجهم من الغيرة.
البيان الأخير كيقول، أسيدي، بلي تم “تفكيك شبكة إجرامية دولية مغربية” عالية الخطورة، وتوقيف 61 شخص مغربي في ولاية وهران كانوا كيوجدو لـ”أعمال تخريبية تمس بالأمن العام”. الحدث لحد هنا كيبان خطير، ولكن ملي كتقرأ تفاصيل “الحبكة الدرامية”، كيبدا العرض الكوميدي.
أجي نفهمو هاد الفيلم الهندي: هاد الـ 61 مغربي (لي زادو فيهم عسكري سابق باش يكملو به بهارات الأكشن)، طارو في الجو ونزلو في مطار تونس، ومن تما ضربوها بـ “الترينينغ” وتسلقو المسالك الجبلية الوعرة والممرات الغابية المعزولة في منطقة القالة بولاية الطارف في أقصى الشرق الجزائري… وبقاو غاديين، قاطعين الجزائر من الحدود التونسية شرقا حتى لوهران في أقصى الغرب 61 واحد دازو على نص قارة، مسافرة برا، ومشافهم حد حتى وصلو لوهران باش يديرو “التخريب”. واش هادو أشباح؟ ولا لابسين طاقية الإخفاء ديال هاري بوتر؟ ولا الأمن الجزائري كان داير ليهم “الويفي” باش يتتبع خطواتهم؟
والنكتة الكبيرة ماشي فهاد الرحلة المكوكية، النكتة في “المحجوزات الفتاكة” لي شدوها معاهم. الأمن العتيد ملي أحبط هاد المخطط، شنو لقى؟ متفجرات؟ أسلحة دمار شامل؟ لا أسيادي، لقاو عندهم “جوازات سفر مغربية” (سبحان الله، مغاربة وعندهم باسبور مغربي!)، ولقاو مبالغ مالية بـ”الدرهم المغربي” واليورو. يا سلام على أدوات التخريب! يبدو أن الدرهم المغربي أصبح سلاحاً يهدد الأمن القومي الجزائري في وهران، وجواز السفر الأخضر ولا قنبلة موقوتة.
صراحة، هاد السيناريست لي كتب هاد القصة خاصو جائزة “أوسكار” لأكثر قصة خيالية مضحكة في 2026. باين بلي متلازمة “المغرب” ولات مرض مزمن معندوش دواء عند النظام الجزائري، وملي كيبغيو يغطيو على الطوابير والمشاكل الحقيقية، كيلعبو ورقة “المؤامرة الخارجية” بسيناريوهات كضحك عليهم العالم.
برافو “عمي تبون”، برافو للأمن الوطني الجزائري على هاد الخيال الواسع… وكنتسناو الجزء الثاني بفارغ الصبر، ربما المرة الجاية غيقولو لينا بلي المغاربة جاو في أطباق طائرة.
