أخزو زهير /فاس
في الوقت اللي العالم كامل كيشهد بالتحول اللي عرفاتو عاصمة الأنوار، الرباط، وبالجمالية ديال شوارعها المضيئة، وصومعة حسان التاريخية، والمساحات الخضراء اللي ولات مفخرة للمغاربة، اختار مراسل قناة “النهار” الجزائرية يغرد خارج السرب، وبطريقة كتدعو للسخرية والشفقة في نفس الوقت.
المراسل المذكور، وبدل ما ينقل الصورة الحقيقية ديال مدينة الرباط اللي ولات “متحف مفتوح”، ضرب الطم على كل ما هو زوين، وغمض عينيه على الهندسة المعمارية العصرية والحدائق الغناء، ومشى كيجري لواحد “الأرض خلاء” باش يصور التقرير ديالو. السيد خلا القناطر والترامواي والنافورة الموسيقية، ومشى كيقلب فين كاين الحجر والشوك، باش يبيع للجمهور ديالو صورة “مفبركة” كتشبه للأوهام اللي عايشين فيها.
سكيزوفرينيا إعلامية؟
محللين ومتتبعين اعتبروا هاد التصرف ماشي مجرد “خطأ مهني”، بل هو “أجندة مقصودة” كتحاول تغطي على الشمس بالغربال. كيفاش يعقل مراسل كيتواجد في قلب عاصمة إفريقية كتحصد الجوائز الدولية في التخطيط العمراني، وكيمشي يقلب على “الزبالة” أو “بقعة مهجورة” باش يدير منها “سكوب”؟ هادي كتسمى في عرف الصحافة “العمى الاختياري”.
الجمهور المغربي على مواقع التواصل الاجتماعي تفاعل بسخرية كبيرة مع هاد التقرير، واعتبروا أن “النهار” الجزائرية بقات وفية لمنهجها في تزييف الحقائق. الرباط كتبقى عاصمة الأنوار، وصومعة حسان غتبقى شامخة، والشوارع المضيئة غتبقى شاهدة على التطور.. أما “الخلا” الحقيقي، فهو اللي كاين في عقول هاد النوع من الإعلاميين اللي كيحقدو على النجاح المغربي.
بزاف ديال المتتبعين وجهوا رسالة لهاد المراسل وقالو ليه: “المرة الجاية إلا تلفتي على الطريق وما لقيتيش الشوارع الزوينة، استعمل غير ‘جي بي إس’، راه الرباط كلها ضاوية، وصعيب بزاف تخبي جمالها واخا تعيا ما تصور في الخلا!”
